गैर आख्यान
सिरिजङ्गा, फाल्गुनन्द र इमानसिंह चेम्जोङका लेखोट
Description :
सिरिजङ्गा सिङ् थेवे याक्थुङ लिम्बु समुदायमा जन्मिएका एक महान् व्यक्तित्व थिए । उनी याक्थुङ पहिचानलाई जगेर्ना गर्न याङ्वरकदेखि सिक्किमसम्म सक्रिय रहे। सिक्किमका ठछाङ लामाहरूको हातबाट सहादत प्राप्त गर्नअघि सिरिजङ्गाले याक्थुङ भाषा, सिरिजङ्गा लिपि, मौलिक युमा धर्म र नीति शिक्षाको व्यापक प्रचारप्रसार गरेको इतिहासकारहरूले उल्लेख गरेका छन् । अतः सिरिजङ्गा सिद्ध थेवे समुदायको श्रद्धेय व्यक्ति हुन पुगेका हुन् । तत्कालीन समयको राजनीतिक, सामरिक, सभ्यताको टकरावहरूकाबीच उनी याक्थुङहरूको सभ्यता जोगाउने अभियानमा हिंडे । यसकारण पनि उनी देशकै एक अमूल्य निधि हुन् । राष्ट्रिय विभूति हुन् ।
याक्थुङ इतिहास र मुन्धुमका खोजकर्ता एवम् लेखक अर्जुनबाबु माबुहाङ र युवा सांस्कृतिक अभियन्ता एवम् सर्जक अमित थेवे मिहाङको लामो समयको खोज, स्थलगत अध्ययन र स्रोतको संकलनको परिणाम हो 'सिरिजङ्गा, फाल्गुनन्द र इमानसिंह चेम्जोङका लेखोट' नामक पुस्तक ।
